ما تقوي قلبك؟

لمّا بقلّك بكرهَكْ

بقصد بحبَّكْ

واتمنّى ابوسَكْ واحضنَكْ

لكن بصدَّكْ

ببعد وبهرب إنّما

بتمنّى قربَكْ

إنتَ السّببْ

شو يعني تسألني ولَكْ؟

ما تقوّي قلبَكْ؟

أجمل شعور

أجمل شعور

لما الحبيبة تؤمرك: (إشتقتلك زيحلي)

أو لما زهرة مفتحة تنادي على النحلِة

أو لما ع مراية بنت بتزبط الكحلِة

بتوقف على الشباك

بتضل ترمي شباك

بلكي علق واحد حلو ياخدها في رحلِة

أو لما صاحبنا البحر ينده على العاشقين:

(يللا على غطة سوى بتِحْلَوّ وبتحلي)

أو لما عصفورة بتطعم فرخها

أو أم بترضع

طفلة تحت نخلِة

أو لما دمعات الفرح نزلت على خدود الأبو في ليلة الدخلِة

أو وردة ع البلكون

قالت لكل الكون:

(بستنى يقطفني طفل يهديني للطفلِة

يللي إجت باسته

لكن على غفلِة

في آخر الحفلِة)

أقولك بس من الآخر؟

أقولك بس من الآخر؟

بلا تزويق

ولا تلفيق

ولا تدقيق

بألفاظي

ولا لفة على الداير

لا نا روائي ولا شاعر

ولا بعرف أجامل حد

ولا ملحلح ولا شاطر

بقول اللي بحسه وبس

وجمهوري قلب ناطر

وأرض بتشتهي غيمة

وعطشانة على الآخر

أنا مش ممكن اترهبن

ومش مؤمن بأفلاطون

ولا نا من بني عذرة

ولا نتي صورة ع الكرتون

ويمكن فيي مغناطيس

بيجذب عن بعد مليون

وإنتي مش جميلة وبس

أنوثتك عبقت بالكون

ولك إنتي بشراييني

ومهما بعدتي تبقي هون

لسانك لو نكر حبك

بتشهد رنة التلفون

كلامي ليكي لون واحد

وكلامك ألف لون ولون

حرام تبهدلي قلبي

وقلبك في الحفظ والصون