مش بنفهم بالسياسة
واحنا مش عاوزين رئاسة
احنا عايزين الماهية
تيجي قد السلطانية
وتشتري شوية ملابس
للعيال اللي بترجف في المدارس
ولما يمرض حد فيهم
تشتري م الأجزخانة أي حاجة بتداويهم
وانتو يا بتوع الكراسي
كلكم والله ع راسي
بس حلوا عن سمانا
انتو مش لاقيين سوانا؟
لما نمشي في الشوارع
مش ضروري ف كل حتة نشوف صوركم
او نصلي في الكنايس والجوامع
مش ضروري الخطبة يعني كلها بتكون عليكم
ومش ضروري نشرة الأخبار بتنسى
انه احنا جوعانين وعيانين وبردانين وقرفانين
وبتفتكر بس الزعامة اللي ف عينيكم
مرة تانية يللي قاعدين
تحكمونا وانتو غاطسين في البيسين
حتى ما تقولوش علينا انتو مين
احنا مش عاوزين رئاسة
ومش بنفهم بالسياسة
