بعد معاناة طويلة، استطعت إيقاف إلحاح الفيسبوك المستفز، وأسئلته الخبيثة: في أي كلية درست؟ من أي مدرسة خلصت ال(هاي سكول) .. واقتنع - على ما يبدو - بأنني لم أدخل جامعة ولا (هاي سكول) ولا حتى مدرسة إبتدائية .. وربما هو لم يقتنع ولكنه يئس وقبل مني على مضض ادعائي بأنني لم أدخل جامعة ولا مدرسة ..
المهم .. الفيسبوك حالياً يتدخل بتصنيفي لما يسميهم هو (أصدقاء) ..
وضعت احدهم في قائمة ال (كلوز فرندز) .. وبعد مدة اكتشفت بأنه حذف ذلك الإسم من تلك القائمة ..
- ممكن - لو سمحت - أعرف بأي حق حذفته من القائمة؟
- والله أنا لم أقتنع!
- ليش؟
- لأنه حتى يكون شخص معين في قائمة ال (كلوز فرندز) مفروض يكون عنجد (كلوز فرند)!
- طيب؟
- الشخص اللي حضرتك اعتبرته (كلوز فرند) مش (كلوز فرند)
- يا سلام!
- طبعاً .. عمره (شيرلك بوست)؟
- لا .. هو ما (بيشير) إلا (بوستات) دينية .. وأنا - زي مانتا عارف - معنديش (بوستات) دينية
- طيب .. عمره (كمنتلك) ع (بوست)؟
- ممممممم .. مرات .. يعني .. (كمنت) مرتين او ثلاث مرات
- طيب يا ذكي .. عمره (ليكلك)؟
- آه .. من وقت للتاني (بليك) .. إذا بحبشت بتلاقي .. أقسم بالله بتلاقي بس إنت بحبش
- طيب بوعدك أبحبش .. بس حتى لو لقيت (لايكين) ثلاثة هذا مش مبرر يكون في ال(كلوز فرندز) .. وخاصة إنو بيطنش رسائلك ع الخاص وعمرو ما رد عليها
- أنا حر .. وأعتقد مش من حقك تتدخل في خصوصياتي
- حبيبي روووووق وبلاها العصبية معي .. شكلك مش عارف مع مين بتحكي! ولك أنا الفيسبوك أنا .. فاهم ولا لأ؟
