خايف تكون آخر قصيدة
قبل السفر في اللي بسافروا فيه للحتة البعيدة
خايف كمان النعي ما ينزل مكانه في الجريدة
إنه المذيعة تغلط بإسمي .. وخايف لما ييجوا يدفنوني تكتر الأمطار وما يفضل على المدفن سوى الحارس بيشرب شاي مع مراته الجديدة
خايف من العتمة .. وخايف تنكسر طوبة .. وخايف لما تبدأ فيا دودة
خايف من اللي قالوا حاملي حديدة
خايف يطفوا الكهربا ف بيت الأجر
أو يخلص الغاز اللي بيدفي البشر
يتوحوحوا ويمشوا قبل ما تخلص الختمة على روحي أو قصار السور
خايف بعد كام يوم يقولوا إنه روحي لسه دايرة في الشوارع
أو يقولوا يللا ما بيجوز على الميت سوى الرحمة ولو إنه بلا أخلاق وصايع
خايف يبيعوا كل أوراقي على الكيلو لبياع الكعك أو حتى بياع الكوارع
خايف قبل ما تخلص العدة بشهر
إنه حبيبتي تقتنع إنه الحزن في القلب بس ومش ضروري تدفني نفسك معاه
وان الحياة الحلوة لازم تستمر
وان الحياة هيه الحياة
والحي أبقى م اللي مات
وشوية بشوية بتملى البيت صبيان وبنات
