مرة .. إمي (الله يرحمها) كانت زعلانة مني عشان إشي لحد هسا مش عارف شو هو.
كنت أيامها حبّيب وبنحبْ .. وكنت سارح في قصيدة ناوي أدبلجها عشان أعطيها لبنت الجيران السمرا اللي كانت توقف ع بلكونة بيتهم والهوا يلعب بتنورتها القصيرة وتنورتها القصيرة تلعب بقلبي.وفجأة انتبهت ع صراخ إمي : ولك يا غضيب صرلي ساعة بقلك قوم حط الخاير ع الماخوذ وهات الشسمو.
سألتها: هاه؟ شو يعني؟
قالتلي: ولساتك بتسأل؟
طبعاً أكلت كتلة .. وطارت القصيدة .. وفيما بعد طارت بنت الجيران السمرا اللي كانت توقف ع بلكونة بيتهم والهوا يلعب بتنورتها القصيرة وتنورتها القصيرة تلعب بقلبي.
نفس الإشي عم بيصير حالياً معانا .. لما الحكومة فجأة تسأل أي واحد فينا: ولك يا غضيب انت ما بتعرف انه ممنوع تكتب خاير ع الماخوذ وتجيب سيرة الشسمو؟؟؟
