من برا هالله هالله

قال بيقولوا النسوان مظلومين بمجتمعاتنا .. كذب وافتراء. احنا مجتمع كل رجاله نسونجيين ..

في المول مثلا .. اذا اجت وحدة بدها تشتري بيلتعن سنسفيل ابو الدور والنظام كرمالها .. والله لا يقيم عشرين زلمة واقفين عالدور.

واذا وحدة طلعت بالباص بيصير الكل يتضبضب عشان البنت تقعد جنبه ..

واذا مثلا البنت اتدايقت من ريحة الدخان الكل بيهب في اللي معاه سيجارة وبيشلو امله: يا أخي مش قادر تصبر بلا دخان عبين ما تنزل؟ أي دخيل ألله .. كلها نص ساعة. ذبحتنا بدخانك! واول ما تنزل البنت من الباص الكل بيطول سيجارة وبيولعها.

وعشان فكركم ما يروح لبعيد النسوان في مجتمعنا مش عايشين بنعيم .. لأنو إحنا زلامنا بوجهين .. مع القريبة بوجه ومع الغريبة بوجه ثاني .. برا زوء وأدب ولطافة وجوا شخط وتبويز وصياح عالفاضي والمليان ..

أول كانت البنت تنحرم من التعليم وهلأ بنعلمها عشان ناخد راتبها وبنتركلها منه نتفة لزوم الفستان والكندرة والمكياج ..

أول كانت البنت ممنوع تظل بعد ال17 بلا زواج وهلأ بنقول مهل عليها خليها شوي تساعد بمصاريف اخوانها وخواتها الصغار ..

المشكلة والمصيبة انو احنا بنعمل كل هاي الأشياء وبنبررها بالدين .. والحقيقة إحنا ويييييييييييييييييين والدين وين!

وبننسى ما أكرمهن إلا كريم وما أهانهن إلا لئيم ..

وبننسى رفقا بالقوارير ..

وبننسى خيركم خيركم لأهله وأنا خيركم لأهلي ..

يا ألله قديش بننسى .. اللي بدنا ننساه .. وبس!