من غير يمين احنا العرب شعب غير شكل. والدليل انو رمضان عنا بلش من قبل ما يبلش. وتأثير الصيام علينا بلش من قبل ما نصوم.
بدكم دليل؟ طيب عدوا على أصابعكم.
أولا أسعار كل المواد التموينية اللي في السوق شاطت بتناسب طردي مع اقتراب رمضان وبتناسب طردي مع درجة الحرارة. على سبيل المثال سعر كيس الثوم اللي كان بربع ليرة فجأة نط لليرة وربع والحبل عالجرار.
والدليل الثاني انو الحكومة من قبل رمضان بلشت تحضر الناس على التفرغ للعبادة والخشوع فمنعت موظفين الدولة من الوصول لكل المواقع الاخبارية عالانترنت عشان الموظفين ما ينشغل بالهم بأي شي غير التسبيح والتهليل وذكر الله.
ومن ضمن المواقع اللي شملها المنع موقع تنفيس. الحق عليك يا كامل .. يعني كان لازم تسميه موقع اخباري؟ مش لو سميته ”هشك بشك“ او ”عالدقة والنص رقصني“ كان ما شملوه بالمنع؟ الله يسامحك ع هالعملة!
ومن ضمن الأدلة انو بقدرة قادر رح يطلع جزء خامس من ”باب الحارة“ وبقدرة قادر رح يرجع ”ابو عصام“ للحياة ويمكن كمان يرجع ”ابو شهاب“ وبالمرة يمكن يرجع الدعشري.
ومن ضمن الأدلة كمان ..
ولا أقولكم؟ بيكفي أدلة. أصلاتن هيه واضحة زي الشمس في رابعة النهار ومش بحاجة لأي دليل .. إحنا شعب فاخر من الآخر. وبيكفي انو شاعرنا من قبل اكثر من الف وخمسمية سنة جعط جعطة خلت كل الناس التانية من يومها ليوم الدين مبهورين ومشدوهين لما قال:
إذا بلغ الفطام لنا رضيعٌ تخر له الجبابر ساجدينا
مش بقولكم احنا شعب غير شكل؟
