جارنا ابو ازحاق

جارنا ابو ازحاق زلمة شراني .. يا أخي كل مدة ومدة ما بنسمع إلا وهالزلمة هايظ على مرته وولاده وهات يا مسبات وظرب ..

مسكت جاري ابو صطام: يا أبو صطام يعني عاجبك هالحكي؟ قال آه والله عاجبني .. النسوان ما بدهم غير تكسير راس تا يعرفن إنو ألله حق!

تركت أبو صطام ورحت لجارنا الثاني شنيور .. يا شنيور، برظيك اللي بيصير بدار ابو ازحاق؟ قال وشو يعني اللي بيصير؟ المرا شرانية ومقوية عيون ولادها ع أبوهم وطول نهارها بتنشر غسيلاتها على حبالنا وكل ما نقلها هاي حبالنا وهظاك حبلك بتقول السطح النا كلنا مش الكو لحالكو ..

حكيت مع كل الجيران ولا حدا منهم قبل يتدخل ..

المهم .. قد ما حاولت معاهم قالولي يا زلمة وانتي شو بدك بوجع هالراس؟ لويش مدوش حالك بهالقصص الطرمة؟ قلتلهم يا جماعة والله ما هو هاينلي بهالمرا .. كل اسبوع مطبوشة ونازل دمها ..

رحت للشيخ نواف .. الشيخ نواف صفن .. الصحيح إنه زلمة نشمي .. وقللي اسمع يا خوي .. انت انتخيتني وانا اخوك .. ومن هالشوارب هاي كل ما تنفشخ هالحرمة او حدا من ولادها ماكون الشيخ نواف اذا ما عالجته ع حسابي ..

وفعلا الزلمة راح عالصيدلية وجاب قطن وشاش وميكروكروم ..

ها ولا شلون؟ مهو الناس لبعظ .. ولا انا غلطااااااان؟