والسيدة حرمه

على سريرين متجاورين في قسم الأطفال حديثي الولادة، طفل وطفلة ..

- بسسسسسست

التفتت الطفلة إلى مصدر الصوت

- بتبسبسلي يا قليل الأدب؟

- قصدي شريف والله .. إنتي شو إسمك؟

- لسه .. أبوي وإمي ما سموني .. وإنتا؟

- ولا أنا

ضحكت الطفلة ..

- طيب .. مبدئياً .. انت اسمك فادي وأنا فادية .. ماشي؟

- بتموني .. تؤبشني هالضحكة الحلوة

- عنجد؟ ضحكتي عجبتك؟

- ولك مش بس عجبتني .. ضحكتك شقلبتلي كياني

ضحكت الطفلة مرة أخرى

- يا خرابييييييييييييي .. هاتي بوسة!

- لأ .. اخطبني من ماما وبابا بالأول!

- أخطبك؟

- طبعاً .. مش معقولين إنتو .. شو؟ بتفكروا بنات الناس لعبة؟

- مش القصد والله .. بس أنا لساتني ما كونت حالي

- مش شغلي .. ما في ولا بوسة قبل الخطبة

دخلت الممرضة .. حملت الطفل بيد والطفلة باليد الأخرى .. فانضغط على صدرها جسدا الطفلين .. استغل فادي الموقف وقبل فادية .. فبكت

- حيوان .. حقير .. قليل أدب ..

- والله ما كان قصدي

- مبلى كان قصدك .. هلأ هلأ هلأ بدك تخطبني من ماما وبابا! مامااااااااااااااااااااااااااااااااااااا

كان لا بد أن يصلح فادي غلطته .. وفي مساء ذلك اليوم كان على سريرهما باقة ورد .. وعليها بطاقة: السيد فادي والسيدة حرمه .. بالرفاء والبنين!