يا سلااااااااااام .. لو هسه يرن جرس الباب .. وأقوم أفتحه .. ألاقي (قال زي أفلام السينما السورية-المصرية المشتركة) واحد بيقولي: لو سمحت وقّع هون! أوقّع .. وأتطلع ع الورقة وأوقع من طولي ع الأرض .. ويصحوني بالنشادر .. وكل ما أصحى يرجع يغمى عليي .. ويقولولي وقعت قلوبنا شو مالك؟ أقوللهم طلعلي عم مليونير في فنزويللا .. مات وتركلي لحالي ثلطاشر مليون وخمسمية وسبعة وستين ألف وأربعمية وثلاثة وعشرين دولار و 72 سنت!
طيب بلاش .. عارف إنها جعطة كبيرة ولو انها مجرد تخيل .. تخيل على قدك يا ولد!
يا سلاااااااااااام .. لو هسه يرن جرس الباب .. وأقوم أفتحه .. ألاقي إبن صاحب الشركة اللي كنت أشتغل عنده قبل خمسة وعشرين سنة بيقوللي: هظول رواتب الخمس شهور ونص اللي إلك بذمتنا .. أبوي وهو بيموت تذكرهم وحلفنا إنه نعطيك إياهم .. بنترجاك تقبلهم وتسامحه!
برضو كبيرة؟
طيب بلاش ..
يا سلااااااااااااام .. لو هسه يرن جرس الباب .. وأقوم أفتحه .. ما ألاقيش حدا .. وأتطلع ع الأرض ألاقي كرتونة فيها علبة دخان وحبة سنكرز وباكيت تشيبس وربطة خبز وعلبة سردين بالفلفل!
قولكم بتصير؟ ولا هاي كمان من المستحيلات كالغول والعنقاء والخل الوفي؟
