بلالين

كم أعجبتني ألوان (البلالين) التي كان ينفخها أبي .. بلالين صفراء، وحمراء، وخضراء، وزرقاء، وبيضاء بلون الحليب ..

اقتربت منه ..

- يابا

- شو بدّك؟

- بدّي بلّون أحمر

- سدّ نيعك

انكمشت كقطّة، وبكيت ..

قالت أمي: يا زلمة إعطيه واحد .. من نفسه

ردّ عليها أبي: اسكتي بلا فلسفة

- يا زلمة بلّون واحد .. يعني عاجبك هيك فنست الولد؟

لم يردّ. استمرّ في نفخ البلالين .. وعندما انتهى قال لي: يالله قوم!

- وين؟

- قوم معي!

- عندي دراسة

- يعني رح تصير وزير يا فالح؟

قمت ..

على دوّار فراس وقفنا .. أعطاني قسما منها .. بلالين صفراء وحمراء وخضراء وزرقاء وبيضاء بلون الحليب ..

- شو أعمل فيها؟

- زي ما بتشوفني بسوّي سوّي ..

دقائق وحفظت الدرس ..

وصرت أركض بين السيّارات المتوقّفة على الإشارات الضوئيّة .. أنقر على زجاج السيّارات واحدة واحدة:

- فرّح إبنك بنص ليرة .. فرّح إبنك بنص ليرة .. فرّح إبنك بنص ليرة ..