غسيل أموال

كنت غاطساً في العمل عندما رن موبايلي .. كانت ابتسام ..

- مرحبا!

- يا هلا!

- محمد .. انت ضايعلك مصاري إشي؟

فكرت ..

انا ضايعلي مصاري؟ انا ضايعلي مصاري؟ انا ضايعلي مصاري؟ ..

- لأ .. مش متذكر إني مضيع مصاري .. ليش؟

- لإني لقيت ثلاثين ليرة .. وقلت أسألك بلكي انتا مضيعهم ..

- وين لقيتيهم؟

- بالغسالة .. واقعات بالغسالة .. لقيتهم بالغسالة بعد ما طلعت الأواعي منها عشان أنشرهم ..

زوجتي تغسل يوم الإثنين .. اليوم الوحيد الذي اعتدنا أن تصلنا فيه المياه كل أسبوع ..

- مممممممم .. بيكونوا واقعات من جيبة بنطلون أو قميص لما غسلتي الأواعي مبارح ..

- لا .. الأواعي غسلتهم مبارح .. اليوم غسلت أواعيي أنا ومريول ديانا .. غسلتهم اليوم ..

أهلاً .. يعني .. لا أمل

- طيب يللا مبروك .. إذا تلفانين اعطيني إياهم ببدلك إياهم بكرا من البنك ..

- لا شو تلفانين .. محلاهم نضفوا وصاروا يوجّو وجّ ..

تذكرت قصة حكتها لي زوجتي .. حدثت معها في طفولتها ..

- كان في مكتبة بطريقي من البيت للمدرسة .. كنت أحب أمر عليها كل يوم وأشتري أنا وأختي أشياء .. في يوم شفت قلم حبر سائل .. كثير حلو .. أعجبني .. وصممت أشتريه

- طيب؟

- كانت إمي نايمة .. فتحت جزدانها وطلت دينار وسكرت الجزدان ولا من شاف ولا من دري

-أهلاً .. وبعدين؟

- اشتريت القلم .. كان حقه 250 فلس أو 300 فلس .. المهم .. حطيته بمريولي بشكل بارز .. علقته كأنو ميدالية عشان صاحباتي بالمدرسة يشوفوه

- وبعدين؟

- هسه صارت المشكلة المصاري اللي زادوا .. باقي الدينار .. كيف بدي أشتري أشياء زاكية بدون ما حدا يشك بمصدر المصاري

ضحكت ..

-غسيل أموال يعني؟

- آه ..

- وشو عملتي حتى تغسلي باقي الدينار؟

- فكرت .. ووصلت لطريقة ما حدا ممكن يشك فيها أبداً ..

- وشو هي؟

- ولا إشي .. خبيت المصاري في الرمل .. وزعتهم ثلاث أقسام .. شوي هون .. شوي هون .. والباقي (القسم الأكبر طبعاً) هون .. وعلمت الثلاث مكانات بعيدان الأسكيمو ..

- وبعدين؟

- ناديت أختي وأخوي .. يللا نلعب برة؟ .. آه يللا .. تعوا نلعب بالرمل .. نلعب بالرمل ..

أخذتهم للمكان اللي خبيت فيه الفلوس ..

احفروا هون .. حفروا هون .. أخوي لقي 100 فلس .. يعني عشر قروش .. كنت أعرف أن أخوي راح يلاقي 150 فلس .. يعني خمسطاشر قرش .. إحفر يمكن تلاقي كمان .. حفر كمان ولقي باقي حصته .. إحفري انتي كمان هون .. يمكن تلاقي انتي كمان .. حفرت .. ولقيت مصاري .. حصتها .. خليني أحفر أنا كمان .. يمكن ألاقي مصاري زيكم .. حفرت في المكان الذي خبأت فيه القسم الأكبر .. حصتي أنا .. يا سلاااااام .. هسه بنقدر نشتري شو ما بدنا

رجعنا للبيت .. يما يما .. شوفي شو لقينا في الرمل؟ انبسطت أمي ..

اشترينا كل اللي نفسنا فيه .. وطبعا أنا إشتريت أكثر .. مهو رزقتي كانت أكثر .. نصيبهم .. شو أسويلهم يعني؟

- آه فعلاً .. معاكي حق والله .. الدنيا أرزاق ..