نصوص هاربة

أفتح اللابتوب .. تأتيني فكرة لنص ما .. دننننننننننج .. أستعيذ وأبسمل .. أكتب سطراً ونصف وقبل أن أكمل السطر الثاني ..

- محماااد!

أهرول باتجاه المطبخ ..

- كيس الزبالة مليان .. بتقدر تنزله ع الحاوية؟

أحمل الكيس وأنزله إلى الحاوية .. أعود بوجه أحمر وأنفاس متقطعة .. أنظر إلى ما كتبت .. أحاول مواصلة الكتابة .. ولكن .. أين الفكرة؟ .. طارت الفكرة .. بحححح!

أمسح ما كتبت ..

تأتيني فكرة ثانية لنص آخر .. دننننننننننج .. أستعيذ وأبسمل .. أكتب سطراً ونصف وقبل أن أكمل السطر الثاني ..

- محماااد!

أهرول باتجاه المطبخ ..

- جرة الغاز خلصت ..

أعود إلى النص .. أنظر إلى ما كتبت .. (بشرفك عنجد عنجد كنت ناوي تكتب عن داعش يا مشحر؟ وإفرض مثلاً .. مثلاً يعني .. إنهم صاروا قاب قوسين أو أدنى من حضرتك؟ شو راح يصير فيك؟ وليييييي .. لأ يا عم .. يا روح ما بعدك روح!)

أمسح ما كتبت .. (إكتب يا ولد عن الحب والغرام .. شو بدك بداعش وقرايبها؟ أصلاطن من غير داعش مش خلصان .. كيف مع داعش يا أهبل؟)

أجلّس المود تبعي إلى مود الحب والغرام .. دننننننننننج .. أبدأ الكتابة بنيّة القصة .. وإذ بالكلام يخرج مدوزناً (غصب عني) .. البيت الأول .. (وااااااااااو .. يا ولااااا .. والله بيطلع منك مرات .. طب ممتاز .. كمل ..)

- محماااد!

أهرول باتجاه المطبخ ..

- إلك روحة ع السوبرماركت؟

أنزل إلى السوبرماركت ..

- عندك كذا؟

- لا والله يا جار .. ألله جبر .. آخر حبة أخدها زبون قبل 5 دقايق

ولأن العودة إلى البيت بدون الكذا من السبع الكبائر أنبش السوق نبشاً إلى أن ألاقيه .. وأعود بوجه أحمر وأنفاس متقطعة .. أنظر إلى ما كتبت .. (عنجد عنجد إنك مسقع وبارد وجه .. بالله عليك من كل عقلك كنت ناوي تكتب عن الحب والغرام؟ طب شو خليت للمراهقين وبتوع الجِلْ والجالاكسي؟)

أمسح ما كتبت ..

(أحسن إشي يا ولد حط لايكات عن جنب وطرف .. ومش ممنوع تكتبلك كومنت هون ولا هون .. كله بينفع .. مهي الدنيا قرظة ودين يا إبني ..)