توحة

اسمي فتحية .. وييقولولي يا توحة .. رقاصة .. قصدي كنت رقاصة .. كنت رقاصة لحد ما .. ربنا ع المفتري .. ح تقولولي ازاي كنتي رقاصة وانتي بالوش ده .. أنا ما كانشي وشي كده .. كنت زي القمر .. كلهم كانوا بيقولولي كده .. بس حاقول ايه؟ .. ربنا يجازي اللي كان السبب بس ..

لما نقلوني المستشفى .. بعدها بيومين .. حضرة الضابط جيه وسألني: ”بتتهمي مين يا فتحية؟“ سِكِتّ .. مش لإني مش عارفة مين .. سِكِتّ لإني بحب بنتي .. لإني مش عايزهم يئزوها .. هما قالولي ”لو نطقتي بأي حرف مش ح يحصللها طيب“ .. لو أي واحد منكم مكاني مش كان هيسكت برضو؟

أنا قلت في التحقيق إن الغاز ولع فيا وانا بطبخ .. أنا فعلاً قلت كده .. والجرانيل قالت كده .. حضرة الضابط ما صدقنيش .. قاللي: ”يا فتحية لو كنتي خايفة من حد احنا بنحميكي .. قولي وما تخافيش“ .. بس انا خفت وما كانشي ممكن ما اخافش .. أصلكم ما دقتوش اللي انا دقته .. وما تعرفوش اللي أنا بعرفه ..

قبل الحادسة بيوم اتصلوا بيا وقالولي: ”ده انزار نهائي .. لو طلعتي ترقصي مرة تانية مش ح يحصلك طيب“ .. ”انتو مين؟“ .. قالولي ”مالكيش دعوة احنا مين يا فاسقة“ .. ”انتو ازاي بتقولوا عليا كدة؟ هو انتو عمركو شفتو عليا حاجة او مسكتوا عليا حاجة؟“ .. ضحك وقاللي ”وكمان بتقاوحي يا فاجرة؟ عموماً ده انزار نهائي وقد أعزر من أنزر“ .. وقفل السكة ..

رحت لصاحب الصالة .. قلتله ”أنا مش ح ارقص تاني“ .. ”ليه؟ في حد دافعلك أكتر؟“ .. قلتله ”لأ“ .. قاللي ”براحتك .. بس يا روح أمك همه بس ميت ألف جنيه .. ادفعيهم وربنا معاكي“ .. ”ميت ألف جنيه بتوع إيه؟“ .. ”انتي نسيتي ولا إيه؟ ده الشرط الجزائي اللي انتي باصمة عليه“ .. قلتله ”أبوس إيدك أنا منين حجيب لكم ميت ألف جنيه؟“ .. قاللي ”والله انتي حره بأى .. يا ترقصي يا تدفعي“ ..

اتصلت يمكرم بيه .. قلتله ”يا مكرم بيه أنا ف عرضك .. دول عاوزين ميت ألف جنيه“ .. ضحك وقللي ”ميت ألف جنيه بتوع إيه دول؟“ .. قلتله ”يا ادفعهم يا اخسر بنتي“ .. ضحك .. وقللي ”ما تبطلوا شغل الأفلام بتاعكم ده“ .. وقفل السكة في وشي ..

اتصلت بيه مرة تانية .. ”يا مكرم بيه ..“ .. ”بقولك ايه؟ همه خمسميت جنيه ما فيش غيرهم .. وما تعمليش عليا شريفة يا روح امك؟“ .. ”يعني إيه؟“ .. ”استعبطي يختي استعبطي .. تقضي الليلة معايا والصبح يكونوا الخمسميت جنيه في شنطتك“ .. ”بس انت عارف أنا عمري ما حد لمسني يا مكرم بيه غير المرحوم جوزي“ .. ضحك وقاللي ”مهو دايما في مرة أولى يا شاطرة“ .. ”مش ح اقدر يا مكرم بيه“ .. قاللي ”والله ده الموجود .. قلتي إيه؟“ .. المرا دي انا اللي قفلت السكة ..

بعد ما خلصت وصلتي رجعت الشقة .. رن جرس الباب .. ”مين؟“ .. قاللي ”افتحي يا نكسر الباب“ .. فتحت الباب لقيت اتنين بدقون ودشاديش بيضا .. ”انتي فتحية المشهورة بتوحة؟“ .. ”أيوه أنا .. فيه حاجة؟“ .. كان في إيد واحد منهم قزازة فيها حاجة زي الميه فتحها ورماها في وشي وقاللي ”ده عقاب ربنا يا فاجرة علشان حزرناكي وما اسمعتيش الكلام“ .. وهربوا ..

وخرجت من المستشفى .. وطبعا ما رقصتش تاني .. لا في الصالة نفسها ولا ف غيرها .. بحست عن عمل .. أي عمل .. ما حدش قبل يشغلني بالوش ده .. وما كانشي في قدامي غير الطريق اللي جابني هنا .. وانا قابله بأي حكم يرضاه ضميرك يا حضرة القاضي .. بس ليا عندكم طلب واحد بس .. بنتي .. مين ح يصرف عليها يا سعادة البيه؟